కృష్ణాజిల్లా పోలీస్ వెల్ఫేర్ పెట్రోల్ బంక్‌లో నూతన వాహన సేవలు ప్రారంభం
మచిలీపట్నం:
ప్రజలకు మరింత మెరుగైన, సౌకర్యవంతమైన సేవలు అందించాలనే లక్ష్యంతో కృష్ణాజిల్లా పోలీస్ శాఖ ఆధ్వర్యంలో నిర్వహిస్తున్న పోలీస్ వెల్ఫేర్ పెట్రోల్ బంక్‌లో అదనపు వాహన సేవలను జిల్లా ఎస్పీ వి. విద్యాసాగర్ నాయుడు ప్రారంభించారు. హెచ్‌పీసీఎల్ (HPCL) ఆర్‌ఎంఓ అభిషేక్ ప్రతాప్ సింగ్‌తో కలిసి ఆయన ఈ నూతన సదుపాయాలను మచిలీపట్నంలో అధికారికంగా అందుబాటులోకి తెచ్చారు.
ఇప్పటివరకు కేవలం పెట్రోల్, డీజిల్ ఫిల్లింగ్‌కే పరిమితమైన ఈ బంక్‌లో ఇకపై వాహనదారుల కోసం వీల్ అలైన్‌మెంట్, చిన్నచిన్న మరమ్మతులు (రిపేర్లు), సర్వీసింగ్ సేవలు కూడా లభించనున్నాయి. వాహనదారులు ప్రాథమిక సర్వీసుల కోసం ఇతర ప్రాంతాలకు వెళ్లాల్సిన అవసరం లేకుండా, ఒకే చోట సరసమైన ధరల్లో నాణ్యమైన సేవలు పొందేలా ఈ ఏర్పాట్లు చేశారు. ప్రజలకు అందించే సేవలను విస్తరించడమే ధ్యేయంగా ఈ అదనపు వసతులను కల్పించినట్లు ఎస్పీ తెలిపారు.
ఈ కార్యక్రమంలో హెచ్‌పీసీఎల్ సేల్స్ ఆఫీసర్ గంగా ప్రసాద్, పలువురు పోలీస్ అధికారులు, హెచ్‌పీసీఎల్ ప్రతినిధులు మరియు సిబ్బంది పాల్గొన్నారు.
