రూఫ్‌టాప్ సోలార్‌పై అవగాహనకు 6, 7, 8 తేదీల్లో ‘సేవా సేతు అభియాన్’ క్యాంపులు: ఏపీసీపీడీసీఎల్ సీఎండీ పి. పుల్లారెడ్డి
విజయవాడ:
పీఎం సూర్య ఘర్ – ముఫ్త్ బిజ్లీ యోజనలో భాగంగా ఏపీసీపీడీసీఎల్ పరిధిలోని సబ్ డివిజన్, జిల్లా స్థాయిలో అక్టోబర్ 6, 7, 8 తేదీల్లో “సేవా సేతు అభియాన్” క్యాంపులను నిర్వహించనున్నట్లు సీఎండీ పి. పుల్లారెడ్డి తెలిపారు. ప్రతి ఇంటికీ సౌర విద్యుత్‌ను చేరువ చేయడం, ఇంటి పైకప్పుపై సోలార్ ప్లాంట్ల ఏర్పాటుపై ప్రజల్లో అవగాహన కల్పించడమే ఈ క్యాంపుల ప్రధాన లక్ష్యమని ఆయన వెల్లడించారు.
గరిష్ఠంగా ₹78,000 సబ్సిడీ
పీఎం సూర్య ఘర్ పథకం కింద అర్హత కలిగిన గృహ వినియోగదారులకు కేంద్ర ప్రభుత్వం అందిస్తున్న సబ్సిడీ వివరాలను ఆయన వెల్లడించారు:
* 1 కిలోవాట్ సామర్థ్యానికి: ₹30,000
* 2 కిలోవాట్ల సామర్థ్యానికి: ₹60,000
* 3 కిలోవాట్లు లేదా అంతకంటే ఎక్కువ సామర్థ్యానికి: గరిష్ఠంగా ₹78,000
సందేహాల నివృత్తికి అధికారుల ఏర్పాటు
ఈ క్యాంపులలో బ్యాంకర్లు, సోలార్ విక్రేతలు మరియు ఏపీసీపీడీసీఎల్ అధికారులు పాల్గొని నెట్ మీటరింగ్, దరఖాస్తు విధానం, సోలార్ ప్లాంట్ల ఏర్పాటుపై వినియోగదారుల సందేహాలను నేరుగా నివృత్తి చేస్తారని సీఎండీ తెలిపారు.
ప్రతి ఒక్కరూ ఈ అవకాశాన్ని సద్వినియోగం చేసుకుని తమ ఇంటిని విద్యుత్ ఉత్పత్తి కేంద్రంగా మార్చుకోవాలని, విద్యుత్ బిల్లులను తగ్గించుకోవడంతో పాటు పర్యావరణ పరిరక్షణకు తోడ్పడాలని ఆయన పిలుపునిచ్చారు. పథకం మరియు క్యాంపుల గురించిన పూర్తి వివరాల కోసం ఏపీసీపీడీసీఎల్ 1912 టోల్ ఫ్రీ కాల్ సెంటర్‌ను సంప్రదించవచ్చని అధికారులు సూచించారు.
