MachilipatnamLocal News
November 16, 2026
పోలీస్ & లీగల్ డైరీ

మున్సిపల్ ఎన్నికల కౌంటింగ్‌కు పటిష్ట భద్రతా ఏర్పాట్లు: జిల్లా ఎస్పీ వి. విద్యాసాగర్ నాయుడు

  • October 29, 2026
  • 0 min read
మున్సిపల్ ఎన్నికల కౌంటింగ్‌కు పటిష్ట భద్రతా ఏర్పాట్లు: జిల్లా ఎస్పీ వి. విద్యాసాగర్ నాయుడు

మచిలీపట్నం / పెడన:

కృష్ణా జిల్లాలో మున్సిపల్ ఎన్నికల ప్రక్రియ అనంతరం జరగనున్న ఓట్ల లెక్కింపునకు బ్యాలెట్ బాక్సుల భద్రత మరియు కౌంటింగ్ సరళికి సంబంధించి పటిష్టమైన భద్రతా ఏర్పాట్లు చేపట్టాలని కృష్ణా జిల్లా ఎస్పీ వి. విద్యాసాగర్ నాయుడు ఆదేశించారు. ఆయన పోలీసు అధికారులతో కలిసి కృష్ణా యూనివర్సిటీ మరియు పెడన పల్లోటి స్కూల్ ప్రాంగణాల్లో ఏర్పాటు చేసిన స్ట్రాంగ్ రూమ్‌లను, కౌంటింగ్ కేంద్రాలను క్షేత్రస్థాయిలో పరిశీలించారు. ఈ సందర్భంగా బ్యాలెట్ బాక్సులను భద్రపరిచిన స్ట్రాంగ్ రూమ్‌ల వద్ద చేపట్టిన భద్రతా ఏర్పాట్లు, నిరంతర సీసీటీవీ నిఘా, విధులు నిర్వహిస్తున్న పోలీసు సిబ్బంది వివరాలను ఎస్పీ క్షుణ్ణంగా సమీక్షించారు. బ్యాలెట్ బాక్సుల భద్రత విషయంలో ఎలాంటి నిర్లక్ష్యానికి తావులేకుండా అప్రమత్తంగా వ్యవహరించాలని అధికారులను హెచ్చరించారు.

పోలింగ్ అనంతరం బ్యాలెట్ బాక్సులను స్ట్రాంగ్ రూమ్‌లకు తరలించే క్రమంలో అన్ని రకాల ముందస్తు జాగ్రత్తలు తీసుకోవాలని ఎస్పీ అధికారులకు సూచించారు. కౌంటింగ్ హాల్స్‌లో బెంచీల ఏర్పాటు, అభ్యర్థులు మరియు వారి ఏజెంట్లు కూర్చునేందుకు అవసరమైన సౌకర్యాలు సరిగ్గా ఉండేలా చూడాలన్నారు. అలాగే కౌంటింగ్ కేంద్రాల వద్దకు వచ్చే ప్రజలు, ఏజెంట్ల వాహనాల పార్కింగ్ విషయంలో ఇబ్బందులు తలెత్తకుండా రాకపోకలను పక్కాగా నియంత్రించాలని స్పష్టం చేశారు.

కౌంటింగ్ కేంద్రాల వద్ద శాంతిభద్రతలకు విఘాతం కలగకుండా, ఎలాంటి అవాంఛనీయ సంఘటనలకు ఆస్కారం లేకుండా ముందస్తు జాగ్రత్తలు తీసుకోవాలని ఎస్పీ ఆదేశించారు. ఎన్నికల నిబంధనలను పక్కాగా అమలు చేస్తూ, కౌంటింగ్ ప్రక్రియను అత్యంత పారదర్శకంగా, ప్రశాంత వాతావరణంలో పూర్తి చేసేందుకు పోలీసు శాఖతో పాటు అన్ని శాఖల అధికారులు సమన్వయంతో పనిచేయాలని దిశానిర్దేశం చేశారు. ఈ పరిశీలన కార్యక్రమంలో పలువురు పోలీసు అధికారులు మరియు సిబ్బంది పాల్గొన్నారు.

About Author

SSN