కన్నులపండువగా ముగిసిన బందరు దసరా మహోత్సవాలు
మచిలీపట్నం :
బందరులో నవరాత్రి ఉత్సవాలు విజయదశమి వేడుకలతో అత్యంత వైభవంగా, కన్నులపండువగా ముగిశాయి. శమీ పూజ (జమ్మి పూజ) నిమిత్తం మచిలీపట్నంలో ప్రతిష్ఠించిన 56 శక్తిపటాలు నగరంలోని ప్రధాన వీధుల గుండా ఊరేగుతూ చివరికి కోనేరు సెంటర్‌కు చేరుకున్నాయి.
రాత్రంతా పురవీధుల్లో ఊరేగింపు
విజయదశమి పర్వదినం సందర్భంగా రాత్రి పొడవునా పురవీధుల్లో సాగిన శక్తిపటాల ఊరేగింపు భక్తులకు మైమరపించే ఆధ్యాత్మిక అనుభూతిని అందించింది. వివిధ కాలనీలు, ప్రధాన కూడళ్ల గుండా సాగిన ఈ శోభాయాత్ర తెల్లవారుజామున కోనేరు సెంటర్‌కు చేరుకుంది.
శక్తిపటాల రాకకై భక్తుల ఎదురుచూపులు
తెల్లవారుజాము నుంచే కోనేరు సెంటర్ పరిసర ప్రాంతాలు భక్తజనసందోహంతో నిండిపోయాయి. పిల్లలు, పెద్దలు, మహిళలు, పురుషులు అనే తేడా లేకుండా వేలాది సంఖ్యలో భక్తులు తరలివచ్చి శక్తిపటాల రాకకోసం కోనేరు సెంటర్‌లో వేచి చూశారు.
సూర్యోదయం తర్వాత కూడా సందడి తగ్గలేదు. ఉదయం 8 గంటల వరకు కోనేరు సెంటర్‌లో శక్తిపటాల కోలాహలం, విన్యాసాలు అంబరాన్నంటాయి. అనంతరం పూజా కార్యక్రమాలు పూర్తి చేసుకుని శక్తిపటాలు తమ తమ స్థానాలకు తిరుగుపయనమయ్యాయి.
పోలీస్ బందోబస్తు
భక్తుల రద్దీని, ఊరేగింపు ప్రాధాన్యతను దృష్టిలో ఉంచుకుని జిల్లా పోలీసు శాఖ ఆధ్వర్యంలో పటిష్టమైన పోలీసు బందోబస్తు ఏర్పాటు చేశారు. కోనేరు సెంటర్ మరియు ఊరేగింపు సాగిన ప్రధాన మార్గాల్లో ఎటువంటి అవాంఛనీయ సంఘటనలు జరగకుండా సీసీ కెమెరాలు, డ్రోన్ల ద్వారా నిఘా ఉంచారు. ట్రాఫిక్ మళ్లింపులు చేపట్టి, భక్తులకు ఎలాంటి అసౌకర్యం కలగకుండా పోలీసు అధికారులు ప్రత్యేక చర్యలు తీసుకున్నారు.
