MachilipatnamLocal News
November 22, 2026
విద్య - ఉపాధి

ఈ నెల 20న గుడివాడలో మెగా జాబ్ మేళా: 400కు పైగా ఉద్యోగ అవకాశాలు

  • November 17, 2026
  • 1 min read
ఈ నెల 20న గుడివాడలో మెగా జాబ్ మేళా: 400కు పైగా ఉద్యోగ అవకాశాలు

 * నిరుద్యోగ యువత ఈ అవకాశాన్ని సద్వినియోగం చేసుకోవాలి: జిల్లా కలెక్టర్ డి.కె. బాలాజీ

గుడివాడ:

నిరుద్యోగ యువతకు ఉపాధి అవకాశాలు కల్పించే లక్ష్యంతో ఆంధ్రప్రదేశ్ రాష్ట్ర నైపుణ్యాభివృద్ధి సంస్థ (APSSDC) ఆధ్వర్యంలో నవంబర్ 20వ తేదీ (శుక్రవారం) గుడివాడలో “జాబ్ మేళా” నిర్వహించనున్నట్లు జిల్లా కలెక్టర్ డి.కె. బాలాజీ ఒక ప్రకటనలో తెలిపారు. గుడివాడలోని ముగ్గు బజార్ సెంటర్, ఓల్డ్ కరెంట్ ఆఫీస్ రోడ్డులో ఉన్న రెడ్సన్ ఫౌండేషన్ – DDUGKY శిక్షణ కేంద్రంలో ఉదయం 09:00 గంటలకు ఈ కార్యక్రమం ప్రారంభమవుతుందని పేర్కొన్నారు.

పాల్గొనే ప్రముఖ కంపెనీలు

ఈ మేళాలో యాక్సిస్ బ్యాంక్ లిమిటెడ్, హెటేరో లాబ్స్, వరుణ్ మోటార్స్ ప్రైవేట్ లిమిటెడ్, ఎస్‌బీఐ లైఫ్ ఇన్సూరెన్స్, రాజేంద్ర ఎనర్జీ పవర్ సొల్యూషన్స్, జడ్‌ఎఫ్ కమర్షియల్ ఇండియా లిమిటెడ్, ఆదిత్య బిర్లా క్యాపిటల్ లిమిటెడ్, అపోలో ఫార్మసీ, టాటా ఎలక్ట్రానిక్స్ లిమిటెడ్, కురకు ఫైనాన్షియల్ సర్వీసెస్ ప్రైవేట్ లిమిటెడ్, అడేక్కో ఇండియా ప్రైవేట్ లిమిటెడ్, ఎల్విన్ ఎనర్జీ ప్రైవేట్ లిమిటెడ్, బ్లూస్టార్ వంటి ప్రముఖ సంస్థలు పాల్గొంటున్నట్లు జిల్లా నైపుణ్యాభివృద్ధి అధికారి డా. పి. నరేష్ కుమార్ వివరించారు. వీటి ద్వారా 400కు పైగా వివిధ ఉద్యోగాలకు ఇంటర్వ్యూలు నిర్వహించనున్నారు.

అర్హతలు & రిజిస్ట్రేషన్ వివరాలు:

 * విద్యార్హత & వయస్సు: టెన్త్, ఇంటర్, ఐటీఐ, డిప్లొమా లేదా ఏదైనా డిగ్రీ పూర్తి చేసిన 18 నుండి 35 సంవత్సరాల లోపు యువత అర్హులు. ఎంపికైన వారికి మంచి వేతనంతో పాటు ఇతర సౌకర్యాలు కల్పించబడతాయి.

 * ముందస్తు రిజిస్ట్రేషన్: ఆసక్తి, అర్హత గల అభ్యర్థులు ముందుగా [https://naipunyam.ap.gov.in](https://naipunyam.ap.gov.in) వెబ్‌సైట్‌లో తప్పనిసరిగా తమ పూర్తి వివరాలతో రిజిస్టర్ చేసుకోవాలి.

 * తీసుకురావాల్సిన పత్రాలు: ఇంటర్వ్యూకు హాజరయ్యే అభ్యర్థులు తమ రెజ్యూమె (బయోడేటా), ఆధార్ కార్డు (ఫోన్ నంబర్ లింక్ అయి ఉండాలి), పాన్ కార్డు మరియు విద్యార్హత సర్టిఫికెట్ల జిరాక్స్ కాపీలను వెంట తీసుకురావాలి.

 * సంప్రదించాల్సిన నంబర్లు: మరిన్ని వివరాల కోసం 98488 19682, 84648 53703, 95732 78755 నంబర్లలో సంప్రదించాలని అధికారులు సూచించారు.

About Author

SSN