మచిలీపట్టణం – కర్నూలు సిటీ మధ్య కొత్త ఎక్స్‌ప్రెస్ రైలు: ఎంపీ వల్లభనేని బాలశౌరి హర్షం
మచిలీపట్టణం :
మచిలీపట్టణం పార్లమెంట్ నియోజకవర్గంలో రైల్వే కనెక్టివిటీని మరింత బలోపేతం చేస్తూ, మచిలీపట్టణం నుంచి విజయవాడ మీదుగా కర్నూలు సిటీ వరకు కొత్త త్రైవారపు (వారానికి మూడు రోజులు) ఎక్స్‌ప్రెస్ రైలు సేవలకు భారతీయ రైల్వే ఆమోదం తెలిపింది. ఈ నిర్ణయంపై మచిలీపట్టణం పార్లమెంట్ సభ్యులు వల్లభనేని బాలశౌరి హర్షం వ్యక్తం చేశారు.
ఈ కొత్త రైలు అందుబాటులోకి రావడం వల్ల కోస్తా ఆంధ్రప్రదేశ్‌తో పాటు రాష్ట్రంలోని అంతర్భాగ ప్రాంతాల మధ్య ప్రయాణ సౌకర్యాలు మెరుగుపడతాయని ఎంపీ తెలిపారు. ముఖ్యంగా గుడివాడ, విజయవాడ, నరసరావుపేట, వినుకొండ, మార్కాపురం రోడ్, గిద్దలూరు, నంద్యాల తదితర ముఖ్య ప్రాంతాల ప్రయాణికులకు ఈ రైలు ఎంతో ప్రయోజనకరంగా మారనుందని ఆయన పేర్కొన్నారు.
రైలు వేళలు, ప్రయాణ వివరాలు:
మొత్తం 499 కిలోమీటర్ల దూరం ప్రయాణించే ఈ రైలు వేళల వివరాలు ఇలా ఉన్నాయి:
* మచిలీపట్టణం – కర్నూలు సిటీ (సోమ, బుధ, శనివారాల్లో):
మచిలీపట్టణంలో సాయంత్రం 04:55 గంటలకు బయలుదేరి, మరుసటి రోజు ఉదయం 05:45 గంటలకు కర్నూలు సిటీ చేరుకుంటుంది.
* కర్నూలు సిటీ – మచిలీపట్టణం (మంగళ, గురు, ఆదివారాల్లో):
కర్నూలు సిటీలో ఉదయం 09:30 గంటలకు బయలుదేరి, అదే రోజు రాత్రి 09:35 గంటలకు మచిలీపట్టణం చేరుకుంటుంది.
రైల్వే కనెక్టివిటీ విస్తరణ ద్వారా ప్రజల ప్రయాణ కష్టాలు తీరడమే కాకుండా విద్య, వైద్యం, వ్యాపారం మరియు ఉపాధి రంగాలలో ఈ ప్రాంతం మరింత అభివృద్ధి చెందుతుందని బాలశౌరి అభిప్రాయపడ్డారు. మచిలీపట్టణం పార్లమెంట్ పరిధిలో రైల్వే అభివృద్ధికి, ప్రయాణికుల సౌకర్యాల మెరుగుదలకు తన వంతు కృషి నిరంతరం కొనసాగుతుందని హామీ ఇచ్చారు. ప్రయాణికుల అవసరాలను గుర్తించి ఈ రైలుకు ఆమోదం తెలిపిన కేంద్ర రైల్వే మంత్రిత్వ శాఖకు, అధికారులకు ఎంపీ బాలశౌరి ప్రత్యేక కృతజ్ఞతలు తెలిపారు.
