ఏపీఎన్జీఓస్ కృష్ణా జిల్లా భవనానికి ‘దారపు శ్రీనివాస్’ పేరు పెట్టాలి

 * భవన ప్రాంగణంలో కాంస్య విగ్రహాన్ని ఏర్పాటు చేయాలని వక్తల ఆకాంక్ష

 * ఘనంగా మాజీ ఎంపీడీఓ దారపు శ్రీనివాస్ ప్రథమ వర్ధంతి సంస్మరణ సభ

మచిలీపట్నం:

ఏపీఎన్జీఓస్ కృష్ణా జిల్లా భవన నిర్మాణానికి విశేష కృషి చేసిన దివంగత ఏపీఎన్జీఓస్ కృష్ణా జిల్లా శాఖ మాజీ ప్రధాన కార్యదర్శి, విశ్రాంత ఎంపీడీఓ దారపు శ్రీనివాస్ సేవలకు గుర్తింపుగా ఆ భవనానికి ఆయన పేరు పెట్టాలని పలువురు వక్తలు కోరారు. అలాగే భవన ప్రాంగణంలో ఆయన కాంస్య విగ్రహాన్ని ప్రతిష్ఠించాలని ఆకాంక్షించారు. దివంగత దారపు శ్రీనివాస్ ప్రథమ వర్ధంతి సందర్భంగా బుధవారం మచిలీపట్నంలోని జిల్లా కోర్టు సెంటర్ వద్ద ఉన్న నటేష్ ఫంక్షన్ హాల్‌లో కుటుంబ సభ్యులు సంస్మరణ సభను ఘనంగా నిర్వహించారు.

ఉద్యోగుల సంక్షేమానికి చిరస్మరణీయ సేవలు

ఈ కార్యక్రమంలో ఏపీఎన్జీఓస్ కృష్ణా జిల్లా శాఖ అధ్యక్షుడు ఆకూరి శ్రీనివాస్, సంఘ కోశాధికారి ఎం. శోభన్ బాబు, ఆర్గనైజింగ్ సెక్రటరీ ఆర్. హేమ ప్రకాష్, పంచాయతీరాజ్ మినిస్టీరియల్ ఎంప్లాయీస్ అసోసియేషన్ నాయకులు చలమలశెట్టి లక్ష్మీ శ్రీనివాస్, కృష్ణా జిల్లా పరిషత్ డిప్యూటీ సీఈఓ ఆర్.సి. ఆనంద్ కుమార్, ఎన్టీఆర్ జిల్లా మెప్మా పీడీ పి.ఎమ్. కృష్ణ ప్రసాద్, నేషనల్ యూనియన్ ఆఫ్ జర్నలిస్ట్స్ (ఇండియా) ఉపాధ్యక్షుడు బడే ప్రభాకర్, సీనియర్ జర్నలిస్ట్ అంబటి శేషు బాబు తదితరులు పాల్గొని ప్రసంగించారు. తొలుత దారపు శ్రీనివాస్ చిత్రపటానికి పూలమాలలు వేసి ఘనంగా నివాళులర్పించారు.

ఈ సందర్భంగా వక్తలు మాట్లాడుతూ.. ఉద్యోగ సంఘాల బలోపేతానికి, ఉద్యోగుల సంక్షేమానికి దారపు శ్రీనివాస్ చేసిన కృషిని కొనియాడారు. జిల్లా కేంద్రంలో సంఘ భవన నిర్మాణంలో ఆయన పోషించిన కీలక పాత్రను గుర్తుచేసుకున్నారు. ఆయన సేవలను భావితరాలకు స్ఫూర్తిగా నిలిపేందుకు జిల్లా భవనానికి ఆయన పేరు పెట్టాలని, కాంస్య విగ్రహాన్ని ఏర్పాటు చేయాలని అభిప్రాయపడ్డారు.

విగ్రహ ఏర్పాటుకు ఆర్థిక సాయం ప్రకటన

దారపు శ్రీనివాస్ సోదరుడు హరి మాట్లాడుతూ.. తన సోదరుడి జ్ఞాపకార్థం కాంస్య విగ్రహ ఏర్పాటుకు అవసరమైన ఆర్థిక సహాయాన్ని పూర్తిస్థాయిలో అందించనున్నట్లు వేదికపై ప్రకటించారు. ఈ సభలో సహోద్యోగులు ఆయనతో తమకున్న అనుబంధాన్ని గుర్తుచేసుకుంటూ భావోద్వేగానికి లోనయ్యారు. ఈ కార్యక్రమంలో పంచాయతీరాజ్ మినిస్టీరియల్ ఎంప్లాయీస్ అసోసియేషన్ నాయకులు, కృష్ణా జిల్లా పరిషత్ సిబ్బంది, డీఆర్డీఏ ఉద్యోగులు, కుటుంబ సభ్యులు, బంధుమిత్రులు, శ్రేయోభిలాషులు మరియు పాత్రికేయులు పెద్ద సంఖ్యలో పాల్గొని దారపు శ్రీనివాస్ – తిరుపతమ్మలకు శ్రద్ధాంజలి ఘటించి నివాళులర్పించారు.