రేషన్ డీలర్ల సమస్యల పరిష్కారానికి తక్షణ చర్యలు చేపట్టాలి

 * ప్రజా పంపిణీ వ్యవస్థను మరింత పటిష్టం చేయాలి

 * ఈ-పాస్ యంత్రాల వినియోగం, లబ్ధిదారుల సేవలపై సమీక్ష

 * పౌర సరఫరాల శాఖ అధికారి తాటి శివ రామప్రసాద్ సమావేశం

మచిలీపట్నం:

రేషన్ డీలర్లకు ఎదురవుతున్న సమస్యలను పరిష్కరిస్తూ, ప్రజలకు ప్రజా పంపిణీ వ్యవస్థ ద్వారా మరింత మెరుగైన, నాణ్యమైన సేవలు అందించేందుకు చర్యలు తీసుకోవాలని రాష్ట్ర పౌర సరఫరాల శాఖ ఉన్నతాధికారులు జిల్లా జాయింట్ కలెక్టర్, పౌర సరఫరాల అధికారులను ఆదేశించారు. ఈ నేపథ్యంలో మచిలీపట్నంలోని జిల్లా పౌర సరఫరాల కార్యాలయంలో పౌర సరఫరాల ఉప తహసీల్దార్లు , జిల్లాలోని అన్ని మండలాల రేషన్ డీలర్ల సంఘాల ప్రతినిధులు, ఉపాధ్యక్షులతో జిల్లా పౌర సరఫరాల అధికారి తాటి శివ రామప్రసాద్ ప్రత్యేక సమీక్షా సమావేశం నిర్వహించారు.

సమావేశంలోని ప్రధాన ముఖ్యాంశాలు:

ఈ సమావేశంలో రేషన్ దుకాణాల పనితీరును సమర్థవంతంగా నిర్వహించడం, ఈ-పాస్ యంత్రాల సక్రమ వినియోగం మరియు రేషన్ కార్డుదారుల మొబైల్ నంబర్ల నమోదును వేగవంతం చేయడంపై సుదీర్ఘంగా చర్చించారు. రేషన్ డీలర్ల పెండింగ్ బ్యాంకు రుణ దరఖాస్తులు, ఇతర చెల్లింపులను త్వరగా పరిష్కరించాలని అధికారులకు సూచించడమే కాకుండా, డీలర్ల మొబైల్ నంబర్లను సాంకేతిక వ్యవస్థలో నమోదు చేసి అవసరమైన సమాచారాన్ని సకాలంలో అందించాలని నిర్ణయించారు.

ప్రస్తుతం బియ్యం మార్కెట్లో ధరలు ఎక్కువగా ఉన్న నేపథ్యంలో, ప్రభుత్వ నిబంధనల ప్రకారం బీపీఎల్ కార్డుదారులకు కిలో బియ్యం రూ.49 చొప్పున, కేఎన్ఎం రకం బియ్యం కిలో రూ.50 చొప్పున లబ్ధిదారులకు అందుబాటులో ఉండేలా చర్యలు తీసుకోవాలని స్పష్టం చేశారు. అలాగే రైతు బజార్లలో ధాన్యం కొనుగోలు వ్యవస్థను పటిష్టం చేయడంతో పాటు బియ్యం కొనుగోలు, నిల్వలు, పంపిణీ పారదర్శకంగా జరగాలని, ప్రజల నుంచి వచ్చే ఫిర్యాదులపై ప్రత్యేక శ్రద్ధ వహించి వెంటనే పరిష్కరించాలని అధికారులను ఆదేశించారు.