కృష్ణా జిల్లా పోలీస్ కార్యాలయంలో గురువారం నుంచి అగ్రిగోల్డ్ బాండ్ల పరిశీలన
మచిలీపట్నం:
అగ్రిగోల్డ్ బాధితులు, డిపాజిటర్లు మరియు ఏజెంట్లకు న్యాయం అందించేందుకు రాష్ట్ర ప్రభుత్వం చర్యలు వేగవంతం చేసింది. ఇందులో భాగంగా కృష్ణా జిల్లా పోలీస్ కార్యాలయం, మచిలీపట్నం నందు CID మరియు స్థానిక పోలీసు బృందాల ఆధ్వర్యంలో అక్టోబర్ 08, 2026 నుంచి ప్రత్యేక బాండ్ల పరిశీలన కేంద్రం ప్రారంభంకానుంది.
ప్రతిరోజూ ఉదయం 10:00 గంటల నుండి సాయంత్రం 05:00 గంటల వరకు (పనిదినాలలో) ఈ ప్రక్రియ కొనసాగుతుంది. ఈ అవకాశాన్ని బాధితులందరూ సద్వినియోగం చేసుకోవాలని జిల్లా పోలీస్ యంత్రాంగం కోరింది.
ఎవరెవరు ఏ పత్రాలు తీసుకురావాలి?
* డిపాజిటర్ జీవించి ఉన్నట్లయితే:
ఒరిజినల్ బాండ్, కలర్ జిరాక్స్ (సంతకం చేసినది), ఆధార్/గుర్తింపు కార్డు, పాన్ కార్డు, బ్యాంక్ పాస్‌బుక్ మొదటి పేజీ, పాస్‌పోర్ట్ సైజు ఫోటో, మొబైల్ నంబర్ మరియు ఏజెంట్ వివరాలు (తెలిస్తే).
* డిపాజిటర్ మరణించి, నామినీ జీవించి ఉంటే:
పైన పేర్కొన్న పత్రాలతో పాటు డిపాజిటర్ మరణ ధృవీకరణ పత్రం (Death Certificate), నామినీ గుర్తింపు పత్రాలు, కుటుంబ సభ్యుల ధృవీకరణ పత్రం/రేషన్ కార్డు మరియు నామినీ బ్యాంక్ ఖాతా వివరాలు.
* డిపాజిటర్ మరియు నామినీ ఇద్దరూ మరణిస్తే:
ఇద్దరి మరణ ధృవీకరణ పత్రాలు, చట్టబద్ధ వారసుడి ఆధార్, పాన్, బ్యాంక్ ఖాతా వివరాలు, వారసత్వ ధృవీకరణ పత్రం (Legal Heir Certificate) మరియు సంబంధిత పత్రాలు.
* డిపాజిటర్ స్వయంగా రాలేని పరిస్థితి ఉంటే:
డిపాజిటర్ పత్రాలతో పాటు హాజరయ్యే కుటుంబ సభ్యుడి గుర్తింపు కార్డు, సంబంధాన్ని తెలిపే పత్రం మరియు డిపాజిటర్ ఇచ్చిన సంతకంతో కూడిన అధికారిక లేఖ (Authorization Letter).
* ఏజెంట్లు సమర్పించాల్సినవి:
పరిశీలన కోసం ఒరిజినల్ బాండ్, కలర్ జిరాక్స్, బాండ్ ఐడెంటిఫికేషన్ నంబర్, ఏజెంట్ ఆధార్, పాన్, బ్యాంక్ పాస్‌బుక్, ఫోటో, మొబైల్ నంబర్ మరియు ఏజెంట్ కోడ్ వివరాలు.
ముఖ్యమైన సూచనలు:
* ఒరిజినల్ బాండ్లు: అధికారులకు ఒరిజినల్ బాండ్లు అప్పగించాల్సిన అవసరం లేదు. వాటిని కేవలం పరిశీలన (Verification) కోసం మాత్రమే చూపించాలి.
* కలర్ జిరాక్స్ ప్రతులు: సమర్పించే కలర్ జిరాక్స్ ప్రతులపై తప్పనిసరిగా బాధితుడు/నామినీ/వారసుడు సంతకం చేయాలి.
* బ్యాంక్ వివరాలు: బ్యాంక్ ఖాతా సంఖ్య, పేరు, IFSC కోడ్ స్పష్టంగా ఉండాలి. ఖాతాకు మొబైల్ నంబర్ అనుసంధానమై ఉండటం తప్పనిసరి.
* రసీదు: పత్రాలు అందజేసిన తర్వాత అధికారులు ఇచ్చే ధృవీకరణ రశీదును (Acknowledgement Receipt) జాగ్రత్తగా భద్రపరుచుకోవాలి.
